De Lees-Namiddagen
Eenmal in Maand, vun Harvst bet Fröhjohr, gifft dat an elkeen eersten Dünnersdag en plattdüütschen Lees-Namiddag. Dat geiht mit egen Maten vör sik, faken aver ok mit Vertellers un Schrieverslüüd ut dat hele Land. De Namiddage sünd för all Besökers frie un warrt jümmers allerbest besöcht. En Topp-Namiddag is de Wiehnachtslesen mit ünnerschedlichen Lesers un veel Musik.
Utfohrten
Twee Fohrten gifft dat tominnst in elkeen Johr: eenmal na de Westküst för dat Mehlbüdeleten an `t Enn vun den Sommer un een wiedere Dagfohrt. Dor warrt denn jümmers sünnerliche Steden in uns Land besöcht, tosamen eten un Koffie drunken. Bavenan aver steiht jümmers dat Miteenanner. Dat gellt jüstso för de lütten Utfohrten dörch uns schöne Heimat, de tohoop mit de Ölleren vun de Liddmaten maakt warrt.
De Plattdüütschen Kulturdaag
Siet 1993 gifft dat in Eckernföör in Tohooparbeit mit de Tourismusafdelen vun de Stadt all twee Johren de „Plattdüütschen Kulturdaag“. En hele Week kann een sik denn an en grote Programm mit en Barg Afwesseln freuen. För elkeen Smack is dor wat bi: Lesens, Musik, Theoter, Kinnerspelen, usw.
Partnerschop mit de „Düütsche Privatschool“ in Feldstedt/Däänmark.
De gifft dat al siet 1950 un wurr in`t Leven ropen, dormit de düütsche Privatschool in dat Dörp neeg bi Apenraad na den Krieg wedder togang kamen kunn. Ok de Stadt Heid, den Kreis Rendsborg-Eckernföör un de Stadt Eckernföör hölpt blangen de Plattdüütsch Gill dorto mit, wat de School ehr feine Arbeit maken kann.
Lang Tiet geev dat bi uns ok en Danzkrink. En poor Liddmaten draapt sik jümmers noch un danzt ok mal in de schöne Dracht ut de Hüttener Bargen. Un denn geev dat ok jümmers Kinnerfeste un anner Botten för de Lütten. Beides wüllt wi geern wedder aktiveren. För Ideen un Lüüd, de Spaaß mit sowat hebbt, sünd wi heel dankbor.